每次有朋友同我講心事，
我都覺得我應該要令佢叮一聲看透世事先啱，
但我根本唔識講嘢、唔識開解人，
然後會因為自己畀唔到解決方法或者智慧回應而覺得好抱歉。
但朋友仍然會繼續搵我呢個蠢人傾訴，
原來，佢搵我唔係因為佢需要一個智者，而係一個聆聽者。
佢唔想講嘢，我就陪佢呆坐，
佢欲言又止，我就會話：「如果你想講，就慢慢講啦，我會聽。」
《100毛》第207期封面專題（3月16日星期四出版）
【唔開心係OK㗎】 羅蘭姐 劉小華
「咁小事就話要死？」――每次聽到有人咁講，唔知點解我都覺得好驚。
八十後嘅我，細個沉迷閃卡，抽到正嘅閃卡，自不然拎返學校同隔籬位嘅同學炫耀。坐我隔籬嘅同學初初都話驚老師沒收，唔敢帶，但見我將閃卡周圍傳咁開心，終於都肯帶埋佢嘅珍藏返學。
好衰唔衰，嗰日老師搜書包，仲將我哋成班嘅閃卡沒收。
個同學將啲閃卡遞畀老師嘅時候，隻手係咁震，我睇住佢一路望住我，一路標眼淚。當時嘅我心諗，我都畀老師收閃卡啦，好小事啫，唔使咁下話？放學後，成班同學一齊返屋企，大家都笑佢「流馬尿」，佢欲言有止，始終冇出一句聲。
夜晚返到屋企，佢阿媽打嚟我屋企，話佢未返屋企，從其他同學得知，佢阿媽打晒畀全班咁滯。第二日佢冇返學，老師冇講點解，我哋每個人都好驚，但又唔敢問咩事，嗰一排，我因為佢發咗幾次惡夢，好驚佢會出事。好彩嘅係，過咗一排佢重新返學，老師叫我哋唔好問佢發生咗咩事。
明明我同佢發生同一件事，點解佢比我有更大嘅反應？可能我哋每一個人都有獨立嘅內心，可能對當時嘅佢嚟講，閃卡就係佢嘅一切，而喺當下，佢自己根本唔能夠抽離嗰種諗法。
「點解有勇氣離開，冇勇氣繼續落去？」「點解咁小事就唔開心？」「點解咁小事就要去死？」
社會上有情緒病嘅朋友、放棄生命嘅朋友，好多時都會受到類似嘅評論，然後本來一番好意嘅親友，就不知不覺咁用呢啲「好言相勸」將佢哋逼入絕路。
每個人都有其他人難以理解嘅痛苦，既然我哋未必可以完全理解另一個人嘅痛苦，咁用自己嘅觀點解釋對方嘅行為，可能係一種自大嘅表現。朋友向你表示自己情緒低落，我哋除咗表達關心之外，更應該明白，佢哋最需要嘅，並唔係我哋嘅評論，而係我哋嘅理解、聆聽，以及陪伴。
可能佢哋只係需要我哋嘅一句：「唔開心係OK㗎。」
===============================
純港產法式旋轉型生活潮流雜誌《100毛》
每周100條最注目話題 | 看得完 剛剛好
逢星期四出版 | 全港便利店及報攤有售
【唔開心係OK㗎】 羅蘭 劉皓嵐 aka.劉小華
3月16日星期四出版
===============================
#100毛
封面攝影： Deric Wong Photography
Search